Во рамките на проектите од областа на креативните индустрии со поддршка на Министерството за култура, беше реализиран проект за запознавање на младите со традицијата, фолклорот и обичаите, како битни обележја на еден народ.
Целта на проектот беше младите (средношколци) да се запознаат со традицијата, фолклорот и обичаите и преку создавање креативен дух да го запознаат и осознаат својот идентитет, но и да го негуваат културното наследство од нашите предци.
Учениците од средното економско и правно училиште „Арсени Јовков“, во кое учат деца од сите етникуми во државава, под менторство на професорката Розита Закева и со поддршка на професорката Теута Хисени, се запознаваа со колоритот на носиите, истражуваа и изработуваа народни носии од сите етникуми во Република Македонија.
Притоа во холот на училиштето отворија етно катче во кое ги сместија своите изработки – кукли во народни носии. Мултикултурализмот ги спои овие млади луѓе од различни националности и овозможи да се зближат, да разменуваат знаења, да се запознаат и да се дружат меѓусебе во текот на цели четири месеци.